عم عبد الرحيم - محمد الحسن سالم حميد

فتاح يا عليم.. رزاق يا كريم... صلى على عجل

همهم هممممممممممممم

حصن للعباد وهوزز سبحتو ودنقر للتراب

هم فوق هم همــــــــــــــــــــــــــــــــا

صنقع للسماء ..وكان فى الجو فى غيم.. وكم نجمات بعاد.. وكان الدنيا صيف

لا قالتو كيف ..كيف اصبحت كيف.. لا لمست حنان.. لا لمست وداد .. لا رمشة طريف

من قلب وفى.. زى ايام زمان.. ايام التفى

***********

كانت ماها فى

كانت فى المراح .. شدتلو الحمار تحلب فى الغنم

لى شاى الصباح

والطير ما نضم ...... ما رسل نغم

عم عبد الرحيم اتوكل نزل فى المشرع لقا زملان الشقا

الجا من الجريف ... الجا من الجبل

عل الناس بخير صبح هاظرهم نقنق ناقرم وغاظوه ونعل

وعم عبد الرحيم ما بخبر زعل

كل الناس هناك ما بتخبر زعل

تزعل من منو.. وتزعل فى شنو

كل الناس هنا كل الناس صحاب كل الناس اهل

والماهم قراب قربم العمل

............

الطاق اليطق

عشت ابو الزمل بالحالة العليك بالفال بالامل

عم عبد الرحيم كت فلاح فى يوم في ايدك تنوم على كيفك تقوم

لكن الزمن دوار لا بدوم ..

عم عبد الرحيم ماشى على الشغل

فى البال القديم انعارض تكل

تنشايح جراح ياما كيف الغسل

الدنيا ام صلاح تبدا من التكل

من حجة صباح فى حق الملاح

فى اللبس الجديد

فى القسط القديم وبيناتن عشم

فى الفرج البعيد

***********

أمونة الصباح.. قالتولو النعال والطرقن هرن

ما قالتلو جيب ***ما قالتلو جيب

شيلن يا الحبيب غشهن النقلتى والترزى القريب

بس يا ام الحسن طقهن ما بفيد .. طقهن ما بزيد

وانطقن زمن وان طق الزمن لازمك توب جديد

بى اى التمن غصبا للظروق والحالة الحرن

عشان يوم الرحول ما تنكسفى يوم

لو جاراتنا جن مارقات لى صفاح

أو بيريك نجاح

ده الواجب اذن

وايه الدنيا غير لمة ناس فى خير أو ساعة حزن

**************

عم عبد الرحيم يا حر ماك حر

ياريت التمر يا ريت لو يشيل كل تلات أشر

والايام زمان كانت ما تمر

كان ما جاك هوان ما لاقاك ضر

كان لا ضقت ضيق لا انغرغر الصبر لا شابيت غريق لا طوح فقر

وكان ما كان وكان

كان أكسيكي در

*******

حكومات تجى و ... حكومات تغور

تحكم بالحجى بالدجل الكجور

ومرة العسكرى كسار الجبور

يوم قسم النبى تحكمك القبور

تعرف يا صبى مرة تلف تدور

ولا تقول برى او تحرق بخور

هم يا الفنجرى يا الجرف الصبور

كل السقتو ما... باقى على التمور

وارضك راقدة بور ... لا تيراب وصل لا بابور يدور

والماهية أُف ... عيشة هاك وكف

فى هذا الزمن تُف يا دنيا تُف

يا العبد الشقي ما اتعود شكى

لكن الكفاف فوقك منتكئ

والسوق فيك يسوق

حالا ما تُسر

********

الا كمان فى ناس فايتاك بالصبر

ساكنيين بالايجار

لا طين لا تمر

واحدين بالايجار

ما لا قين جحر

سلعتهم الضراع والعرق اليخر

عمال المدن -- كَلات الموانى --- الغبش التعانى ---- بحارة السفن --- حشاشة القصوب

لقاطة القطن-- --الجالبة الحبال--- الفطنة الفرن --- الشغلانتو نار والجو كيف سخن

فرقاً شتى بين ناساً عيشا دين

مجرورة وتجر

تقدح بالاجر ومرة بلا اجر

عيشو كمهو وديشهم هان قدر

*********

وناسا حالا زين مصنع مصنعين

طين فى طين ووين

ما مرابا مر.. بارد همها

لا بيعرق جبين لا وشا يصر

عين والله عين .. كلها كمها .. عزها هان قدر

فى الجنة ام نعيم في الجنة أم قصر يا عبد الرحيم الا ورا القبر

و يلكد في الحمار

لا تسرح كتر فتاح يا عليم وان كان الفقر يا عبد الرحيم اشبه بالكفر

***********

حكومات تجى و... حكومات تغور

تحكم بالحجى ... بالدجل الكجور

ومرة العسكرى كسار الجبور

يوم قسم النبى تحكمك القبور

تعرف يا صبى مرة تلف تدور

ولا تقول برى او تحرق بخور

هم يا الفنجرى يا الجرف الصبور

كل السقتو ما باقى على التمور

وارضك راقدة بور لا تيراب وصل لا بابور يدور

نقرض للحمار

نقريطة الحمار لا تنسى النعال الطرقي الخضار اللبس الجديد تسريح السفر للماشى الصعيد

ماشى الديش نفر

والبـــــــــــــــــــــــــــــــــــــــال اشتغل

والبـــــــــــــــــــــــــــــــــــــــال اشتعل

والبال اشتغل ب الابا مايعيد الحول ما اشتغل

الغبن الشديد .. السابا ورحل ...الضيق المحل ... والفرج القريب

الجو ما وصل زي الحال ده يوم

لا كان لا حصل ... والبال أشتغل

والبال أشتغل

*********************

السكة الحديد يا عمو القطر يا عبد الرحيم قدامك قطر

وسال الدم مطر وطارت دمعتين وانشايح وتر

يا طاحن الخبر.. ما بين الكضا ومرحاكة القدر

الشهدو الدموم و الدمع الهدر

ايدهم فى التراب والعين فى القطر

عارفين الحصل.. عارفين فى حذر ..الخبر اليقين بوخ وانتشر

اطفال القرى وعمال الحضر ادوهو الطيور ودنو البحر

انصاعد سحاب واندافق مطر

عم عبد الرحيم فى الشارع عصر للدار اليسار متفادى الكجر عربية الكجر دورية الكجر

عربية الكجر .. جفلت الحمار.. وطوح زى حجر

وعم عبد الرحيم اتلافا القطر

فتاح يا عليم .. سال الدم مطر

جرتق بالتراب منشور بكتاب .. روشتة وجواب ..ماهية شهر اورنيكين سهر جنب لبدة حمار

مقطوعين ضهر

عم عبد الرحيم يا كمين بشر ---- عم عبد الرحيم يا كمين بشر ----

صحي الموت سلام ... ما يقشاك شر

صح فى الموت سلام ... ما يقشاك شر

صح فى الموت سلام ما يقشاك شر

**********

فتاح يا عليم ... رزاق يا كريم

صلى على عجل

همهم همهممممممممممممممم

حصن للعباد وهوزز سبحتو

ودنقر للتراب هم فوق هم همــــــــــأ

********

عـم عبـد الرحيـم
	محمد الحسن سالم حميد