الممـشي الـعريــض

عبد العزيز العميري

مكتوبة فى الممشى العريض

شيلة خطوتك .. لى البنيّة

مكتوبة بى الخط العنيد ...

فى ذمّة الحاضر .. وصيّة

شاهدة التواريخ والسّير

والإنتظار ..

أدونى من قبلك مناديل الوصول

..وفردت أجنحة العشم ..

فى ساحة الوطن .. البتول

وضحكت ماهمّانى شىء ...

وبكيت ولا همّانى شىء

عندك وقفت من المشى

وغرقت فى ضوء النهار

********

كانوا ..

بتمنوكى لو ترتاحى لحظة ..

على الدرب

حبوكى ... حب

قدر الحروف الحايمة فى بطن الكتب

قدر الخيال ..

ما مدّ إيدو على السحب

كل خاطر كان بريدك

إلاّ ريدك كان رسول الدهشة ...

فى كل  الديار

وأنا زى عوايد الشعر فارس ..

شدّ خيل الكلمة .. ليك

مصلوب على ضهر البداية

القالوا آخرا جايىّ ليك ..

وسرحت يامهوّن .. تهوّن شان أجيك

كان أصل يوم لى حضورك ...

كتْ بريدك .. ومشتهيك

وإنكسر فينى الترجّى

ونلت من سفرى الخسار

بس داير أقولك يا أصيلة

لو تعب فينا التمنى ..

وإنهتك وتر المغنى

لو تسدى علينا طاقات البشاير ...

بنهزم يوم التجنّى

وأجيكى ما همّانى شىء

عندك وقفت من المشى ..

وغرقت فى ضوء النهار